ივანე ჯავახიშვილის სახელობის თბილისის სახელმწიფო უნივერსიტეტის პაატა გუგუშვილის სახელობის ეკონომიკის ინსტიტუტის საერთაშორისო სამეცნიერო
კ ო ნ ფ ე რ ე ნ ც ი ე ბ ი
"ეკონომიკა – XXI საუკუნე"
|
|
|
∘ მადონა გელაშვილი ∘ საინვესტიციო გადაწყვეტილება, როგორც სოციალური მოვლენა ანოტაცია ინვესტიციების, როგორც სოციალური მოვლენის კვლევასა და ანალიზს განსაკუთრებული მნიშვნელობა აქვს საქართველოსთვის, რადგან იგი მიმრთულია მწარმოებლურობისა და ეკონომიკური ზრდის უზრუნველსაყოფად, რაც, საბოლოო ჯამში, აამაღლებს მოსახლეობის ცხოვრების დონესა და ხარისხს. სტატიაში განხილულია საკითხები, რომლებიც ეხება საინვესტიციო გადაწყვეტილების მიღებისას ადამიანთა მოქმედების მოტივაციის ფაქტორებს,რაც ინვესტიციური პროცესების ნათელი წარმოსახვისთვისაა აუცილებელი. საკვანძო სიტყვები: ინვესტიციები, საინვესტიციო გადაწყვეტილება, მოტივაცია, ფინანსური ანალიზი. შესავალი ინვესტიციური პროცესების მოდელი ეფუძნება ეკონომიკურად რაციონალურ მიზნებსა და პიროვნულ გადაწყვეტილებებს, რაც განსაზღვრავს ინვესტირების თეორიისა და პრაქტიკის შემდგომ განვითარებასაც. “ინვესტირების”, როგორც კატეგორიის განსაკუთრებულობა კი უკავშირდება იმას, რომ თვით ინვესტიციები, ასევე პროდუქცია და შემოსავალი, რეალიზდება მხოლოდ გარკვეულ გრძელვადიან ინტერვალში. ამასთან, უნდა აღინიშნოს, რომ საინვესტიციო აქტივობის ეფექტიანობის განსაზღვრის ლოგიკიდან გამომდინარე, არსებობს საკმაოდ მკვეთრი ზღვარი თეორიასა და პრაქტიკას შორის. გარკვეული რაოდენობის ფირმები ინევსტიციური პროცესების ანალიზისას იყენებენ საკმაოდ მარტივ, პრიმიტიულ მიდგომებს და ნაკლებ ყურადღებას უთმობენ ამ სფეროში ახალი იდეების ძიებასა და საინვესტიციო პროცესის შემდგომი პერიოდის კონტროლს. ბევრი მეცნიერი ცდილობდა, გაეცა პასუხი კითხვისათვის, თუ რატომ არსებობს ასეთი მკვეთრი გარღვევა თეორიასა და პრაქტიკას შორის. ნუთუ უცნობია ის თეორიული მიდგომა, რომელიც დაგროვილია საინვესტიციო აქტივობის ფინანსური ანალიზის ახალ მეთოდებთან დაკავშირებით. რა თქმა უნდა, ეს ასე არ არის. მიუხედავად იმისა, რომ ინვესტიციური პროცესების შესახებ მეცნიერული შეხედულებანი დინამიკურად იცვლება, თეორიულად ჯერ კიდევ ვერ შეიქმნა ის მოდელი, რომელიც ადეკვატურად ასახავს პრაქტიკას. ამ საკითხთან დაკავშირებით საჭიროა განვიხილოთ ერთი მეტად მნიშვნელოვანი ასპექტი, რომელიც უდაvოდ დაკავშირებულია თეორიისა და პრაქტიკის შეუთავსებლობასთან. ხშირად უგულებელყოფილი რჩება ის, რომ გადაწყვეტილების მიღება _ ეს, უპირველეს ყოვლისა, ადამიანის ქმედებაა და არა ობიექტური მექანიკური პროცესი. სწორედ ეს ფაქტია დარჩენილი ყურადღების გარეშე ტრადიციულ ინვესტიციურ თეორიაში. საინვესტიციო გადაწყვეტილების მოტივაცია საინვესტიციო გადაწყვეტილებების მიღებაზე მნიშვნელოვნად ზემოქმედებს ადამიანის მოქმედების მოტივაციის ფაქტორები, რაც, ინვესტიციური პროცესების ნათელი წარმოსახვისათვის, აუცილებელია მივიღოთ მხედველობაში. ამისათვის მიზანშეწონილია დაზუსტეს გამოკვლევის ტერმინოლოგიური აპარატი, ცნებები “რაციონალურობა” და “მიზანშეწონილობა”. სწორედ ამ კონცეფციაზე არის დაფუძნებული ინვესტიციების ეკონომიკური თეორია. მიზანშეწონილობის ვიწრო გაგებამ შეიძლება მიგვიყვანოს ინვესტიციური პროცესების არასწორ შემეცნებასთან. უდაvოა, აგრეთვე, რომ ფინანსური ანალიზის შედეგები შეიძლება გამოვიყენოთ იმის მიხედვით, თუ რა მიზანი არის დასახული. ფინანსური ინფორმაციის არაერთგვაროვან გაგებას შეუძლია გამოიწვიოს ინვესტიციური გადაწყვეტილებების პრაქტიკაში განხორციელება. საბოლოო მიზანი კი მდგომარეობს გადაწყვეტილებების მიღებაში, პროცესის ფართოდ გაგებაში და ფინანსური ანალიზის როლის წარმოჩენაში ინვესტიციური პროცესების შეფასებისას. საინვესტიციო საქმიანობა უკავშირდება გადაწყვეტილების მიღებას. ამავე დროს, როგორც წესი, იგულისხმება, რომ გადაწყვეტილებების მიღებისას ადამიანები მოქმედებენ “რაციონალურად”, მაგრამ რას ნიშნავს ეს? ამ კითხვაზე პასუხის გაცემა აუცილებელია თეორიასა და პრაქტიკას შორის არსებული ზღვარის გასარკვევად და შემდგომ გადასალახავად. ყველა მეთოდიკა, რომლებიც შემუშავებულია თეორიის სფეროში, ემსახურება რაციონალური ინვესტიციური შედეგების მიღებას, რაც გულსიხმობს სწორედ კონკრეტული საკითხის “რაციონალურად” გადაწყვეტას. მაგრამ, თუ ადამიანს, რომელიც იღებს გადაწყვეტილებას, განსხვავებული შეხედულება გააჩნია მიზანშეწონილობაზე, ვიდრე ეს ამა თუ იმ მეთოდიკაშია გათვალისწინებული, წარმოიქმნება შეუსაბამობა. ჩვენ კი არ შეგვიძლია პრაქტიკაში მივიღოთ ის მეთოდები, რომლებსაც არ შეუძლიათ გამოხატონ იმ ადამიანთა მოტივაციის “მიზანშეწონილობა” რომლებიც იღებენ გადაწყვეტილებას. ინევსტიციებმა ჩამოაყალიბეს მასში “რაციონალურობის” შესაბამისი გაგება, რაც გულისხმობს იმას, რომ ადამიანებს, რომლებიც იღებენ ეკონომიკურად რაციონალურ გადაწყვეტილებას, განსაზღვრავენ მიზანს, უნარი აქვთ დასახონ მათი განხორციელებისათვის აუცილებელი გზები და ხერხები, განჭვრიტონ საბოლოო შედეგები და მიიღონ “რაციონალური” არჩევანი წინასწარ დასახული მიზნის ოპტიმალურად განხორციელებისათვის. “მიზანი ყოველთვის დამალულია სადღაც დაბანდებულსა და მიღებულს, სტიმულსა და პასუხისმგებლობას შორის... მაგრამ რაც არ უნდა იყოს, იგი გააკეთებს ყველაფერს, რათა მიაღწიოს მას. გამოდის რა მწარმოებლის როლში იგი შეეცდება მაქსიმუმამდე აიყვანოს მოგება” [Squire L, 1981:38]. ინვესტიციური გადაწყვეტილების მიღებაში ეკონომიკურ მოდელს ცოტა რამ აქვს საერთო ჩვეულებრივი ადამიანების ბუნებასთან, რომლებიც იღებენ ინევსტიციურ გადაწყვეტილებას. გ. კუპერი აღნიშნავდა, რომ “ფირმებში ინვესტიციური პროექტების შეფასების ფორმალურ მეთოდებზე უარის თქმა განპირობებულია იმით, რომ ფირმის ქმედება შეიძლება არ დაემთხვას ეკონომიკური კონცეფციის მიზანშეწონილობის გადაწყვეტილების მიღებას” [Cooper, 1975:199]. რეკომენდებული ფინანსური ანალიზის მეთოდები, დისკონტირებული ფულადი ნაკადები, ემყარება იმ დაშვებას, რომ მენეჯერის მიზანია მოგების ზრდის მაქსიმალიზაცია ინვესტიციური პროცესის შედეგად. რა თქმა უნდა, ყოველი ადამიანი, რომელიც იღებს გადაწყვეტილებას, გამოდის თავისი კონკრეტული მიზნებიდან, რაც შეიძლება გულისხმობდეს: პირადი შემოსავლის ზრდას, თავისი პოზიციების გაძლიერებას, გარკვეული ძალაუფლების მოხვეჭას და ა. შ. და ეს მიზნები შეიძლება არც ემთხვეოდეს ფირმის მოგების მაქსიმიზაციის შესაძლებლობას. ამგვარად, წარმოიშობა მიზნების შეუსაბამობა – ის, რაც მისაღები და სასურველია ერთი მხარისათვის, არ არის საუკეთესო არჩევანი მთელი ორგანიზაციისათვის. იმ შემთხვევაშიც კი, თუ დავუშვებთ, რომ ადამიანი, რომელიც იღებს გადაწყვეტილებას, მოქმედებს ორგანიზაციის ინტერესების ფარგლებში, დისკონტირებული ფულადი მეთოდების გამოყენება აწყდება უამრავ სირთულეს. აუცილებელი მოგების ნორმის განსაზღვრისათვის მენეჯერმა უნდა დაადგინოს მომავალი ალტერნატიული ხარჯები, რისკის ხარისხი, რომელიც უკავშირდება ფულადი ნაკადის პროექტებს და პროექტის ფინანსირებისათვის საჭირო კაპიტალის ღირებულებას, გააჩნდეს ზუსტი წარმოდგენა ყველაზე დიდი მოცულობის ფულად ნაკადზე, პროექტის განვითარების შესაძლო ვარიანტების ეკონომიკური შეფასებანი. შემდგომ თუ მენეჯერს არ გააჩნია რაღაც ზებუნებრივი ძალა, მისთვის რთულია განჭვრიტოს მომავალი. კ. მაკრიდაკისი ამის შესახებ წერდა: “ზედმეტად გადაჭარბებულია იმ ეკონომისტებისა და ფინანსისტების, ანალიტიკოსების უნარი, სრულად შეაფასონ ცვლილებები ქვეყნის ეკონომიკაში ან ცალკეულ დარგში, კონკრეტულ ფირმაში ან ცალკეულ პროექტში. მათი გეგმები და პროგნოზები დემონსტრირებაა საკუთარი არასრულყოფილებისა” [Makridakis and Hogarth, 1981:75].M პროექტის შეფასების მოცემული მეთოდის გამოყენების მეორე სირთულე მდგომარეობს თვით ადამიანების ქმედებაში. რ. რეგარტი გამოყოფს იმ ფსიქოლოგიურ თავისებურებას, რომლებიც ზღუდავს მენეჯერის უნარს, სწორად აითვისოს და გამოიყენოს არსებული ინფორმაცია. საქმე ეხება ადამიანის მიდრეკილებას, მეხსიერებაში შერჩევით შეინარჩუნოს მისთვის მისაღები ინფორმაცია და განთავისულდეს იმ მონაცემებისაგან, რომელიც ეწინააღმდეგება მის ინტერესებს. სხვა ფსიქოლოგიური თავისებურებაა ის, რომ ადამიანები უშვებენ: რაც მეტია ინფორმაცია, მით უფრო უკეთესია მიღებული გადაწყვეტილება. თუმცა შეიძლება მონაცემების გარკვეული ნაწილი სრულიად უსარგებლო აღმოჩნდეს. ეს და კიდევ სხვა ფსიქოლოგიური თავისებურებანი იძლევა არასწორ პროგნოზს, რომელიც შემდგომ განიხილება როგორც საკმაოდ დასაბუთებული. აშკარაა, ნამდვილად არსებობს თეორიის პრაქტიკაში გამოყენების პრობლემა. გამოკვლევები ცხადყოფს, რომ პრაქტიკა არ ასახავს ტერიტორიულ წარმოდგენებს იმის შესახებ, თუ როგორ უნდა მიიღონ ადამიანებმა საინვესტიციო გადაწყვეტილებანი, იმისათვის, რომ გავიგოთ იმ ადამიანების მოტივები და მოთხოვნები, რომელიც პრაქტიკაში იღებს გადაწყვეტილებას, ჩვენ უნდა ვიპოვოთ ალტერნატივა იმისა, თუ რა არის რაციონალური და მიზანშეწონილი ქმედება ინვესტიციური გადაწყვეტილების მიღებისას. რაციონალური ქმედება – ეს მთელი კონცეფციაა, რომელსაც დიდი ყურადღება ეთმობა სოციოლოგიურ ლიტერატურაში, ამ თვალსაზრისით ყურადსაღებია მაქს ვებერის ნაშრომები. იგი ასაბუთებს, რომ კომერცია წარმოადგენს ქმედების ერთ-ერთ სახეობას, რომელიც თვითონ წარმოშობს რაციონალურობის მისეულ გაგებას. მიზანშეწონილობის ალტერნატიული გაგების გამოყენებამ ინვესტიციური გადაწყვეტილების განხილვისას შეიძლება მოგვცეს საკმაოდ საინტერესო შედეგი და თუ მენეჯერები გადაწყვეტილების მიღებისას არ იყენებენ ფინანსური ანალიზის რთულ მეთოდებს, ეს არ ნიშნავს, რომ ისინი იქცევიან ირაციონალურად. მაგალითად, 15 წლის წინათ ტყის დამამზადებელ კომპანიას რომ მიეღო გადაწყვეტილება სწრაფმზარდი ტყეების მოშენების შესახებ, ასეთი გადაწყვეტილება ჩაითვლებოდა ეკონომიკურად გაუმართლებლად. დღევანდელი სოციალური და პოლიტიკური სიტუაციიდან გამომდინარე კი ჩანს, რომ ამგვარი გადაწყვეტილება საუკეთესო იქნებოდა კომპანიის გრძელვადიანი განვითარების პერსპექტივისათვის. მაგრამ ყველაფერი ეს ისე არ უნდა გავიგოთ, თითქოს რაციონალური ინვესტიციური გადაწყვეტილებების ალტერნატიული შეხედულება უარყოფს ფინანსური ანალიზის რთულ მეთოდებს. სინამდვილეში ეს მეთოდები დიდ დახმარებას უწევს მენეჯერებს ნებისმიერი ზემოთ აღწერილი მიზანშეწონილი გადაწყვეტილების მიღწევისათვის. საინვესტიციო გადაწყვეტილების ფინანსური ანალიზის მეთოდები ჩვენ ვიცით, რომ ფირმის ფინანსურ მდგომარეობასა და ფინანსური ანალიზის რთული მეთოდების გამოყენებას შორის არის პირდაპირი და უკუდამოკიდებულებაც, რაც გვაფიქრებინებს, რომ ნაკლებ წარმატებული ფირმები თავისი პრობლემების გადაწყვეტას სწორედ შეფასების რთული მეთოდების გამოყენებაში ხედავენ. სამწუხაროდ, ნაკლებ სავარაუდოა, რომ შეფასების რთული მეთოდები თავისთავად წარმოადგეს წარმატების გარანტიას ინვესტირების პროცესში. ამგვარად, ინვესტიციური გადაწყვეტილების მიღება გამოდის პროექტის ფინანსური ანალიზის ჩარჩოებიდან – იგი არ იწყება და არ მთავრდება რთული ფინანსური გამოთვლებით. იმისათვის, რომ ფინანსური ანალიზი სრულყოფილად იქნეს გამოყენებული პრაქტიკაში, უნდა განისაზღვროს მისი გამოყენების წესი. იმის შემდეგ, რაც დავადგინეთ, რომ ეკონომიკური მიზანშეწონილობა არ წარმოადგენს ინვესტირების პროცესის ერთადერთ მამოძრავებელ ძალას, საჭიროა ყურადღება დაეთმოს პრაქტიკაში იმ ინფორმაციის გამოყენებას, რომელიც ფინანსური ანალიზის შედეგია. ლიტერატურაში საკმაოდ არის გაშუქებული ალტერნატიული მოდელები, რომლებიც ცხადყოფს, თუ როგორ გამოიყენონ მენეჯერებმა ბუღალტრული ინფორმაცია. ამგვარადვე შეიძლება იქნეს გამოყენებული ფინანსური ანალიზის ინფორმაციებიც. ბუღალტრულ აღრიცხვას ამ მოდელებში ეკისრება: 1.რაციონალური; 2.სიმბოლური; 3.რიტუალური; 4.პოლიტიკური; 5. დამკანონებლის; 6.დისციპლინური; 7.რეპრეზენტაციულ-იდეოლოგიური როლი. ბუღალტრული ინფორმაციის გამოყენების ზემოთ ჩამოთვლილი გზებიდან ბევრი ეკონომიკური მიზანშეწონილობის ჩარჩოებს მიღმა რჩება, მაგრამ საკმაოდ ხორციელდება პრაქტიკაში [გელაშვილი მ. 2012: 223]. ბუნებრივია, ამ საკითხის განხილვისას იბადება კითხვა: რა კავშირი აქვს ზემოთქმულს ინვესტიციურ გადაწყვეტილებასთან? ის, რომ ინვესტიციური გადაწყვეტილება არ შეიძლება განვიხილოთ ერთმნიშვნელოვნად. მასზე, როგორც “მიზანშეწონილობაზე”, მოქმედებს სხვადასხვა შეხედულება და მიდგომა და, აქედან გამომდინარე, ფინანსური ანალიზის შედეგები შეიძლება გამოყენებულ იქნეს სხვადასხვა პრაქტიკით. მაგალითად, საინვესტიციო პროექტების შეფასებისას წმინდა დაყვანილი ღირებულების (NPV) მეთოდი შეიძლება გამოვიყენოთ, როგორც პროექტის ფინანსური სიცოცხლისუნარიანობის საფუძველი. აქ მთავარია ის, რომ ინვესტიციური გადაწყვეტილების პრაქტიკა არ შეიძლება განვიხილოთ ორგანიზაციული და პოლიტიკური კონტექსტისაგან დამოუკიდებლად. ინვესტიციური საქმიანობა განსაზღვრავს მოცემული ორგანიზაციის არსებობის საფუძველს, მაგრამ თვითონაც გარკვეულწილად დამოკიდებულია მასზე. ამის ნათელი დადასტურებაა ორგანიზაციის ის საქმიანობა, რომელიც პირდაპირაა დაკავშირებული ინვესტიციური გადაწყვეტილების მიღებასთან. ესაა: 1. მოტივაცია და საქმიანობის შეფასება და 2. სტრატეგიული დაგეგმვა. ხშირად წარმოიშობა სიტუაციები, როდესაც “ეკონომიკური მიზანშეწონილობა” ემთხვევა იმ პირთა მიზანშეწონილობას, რომლებიც იღებენ გადაწყვეტილებას. ეკონომიკურად რაციონალური გადაწყვეტილება გულისხმობს წმინდა დაყვანილი ღირებულების და რისკის ხარისხის ანალიზს. წმიდა დაყვანილი ღირებულების (NPV) მეთოდის გამოყენება მენეჯერებისაგან მოითხოვს ფულადი ნაკადის მაჩვენებლებზე განსაკუთრებული ყურადღების გამახვილებას. NPV-ს ანალიზი მიმართულია ორგანიზაციის და, აქედან გამომდინარე, მისი მესაკუთრის “მოგების” მაქსიმალიზაციისაკენ, მაგრამ ბევრ ორგანიზაციას გააჩნია როგორც გრძელვადიანი, ასევე მოკლევადიანი მიზნები. იმდენად, რამდენადაც კაპიტალდაბანდებები გულისხმობს რესურსების ხანგრძლივ პერიოდიან გამოყენებას, ინვესტიციურიგადაწყვეტილებებიც ორიენტირებული უნდა იყოს გრძელვადიან პერსპექტივაზე. პროექტის შეფასების მოცემული მეთოდებიც განიხილავს დროის ხანგრძლივ მონაკვეთს. ამდენად, მენეჯერის წინაშე დგას რთული ამოცანა, რადგან სწორედ მას უხდება მოცემული გრძელვადიანი პროექტების შეფასება და მიღება. ამასთან, შედეგის განჭვრეტა რთულია, რადგან იგი მიიღწევა მხოლოდ პროექტის განხორციელების შემდეგ, ეს პრობლემა სირთულეებს წარმოქმნის გადაწყვეტილების მიმღებ ადამიანთა საქმიანობის შეფასებაში. ხშირ შემთხვევაში ძალიან დიდი დროა გადაწყვეტილების მიღებასა და შედეგს შორის. მენეჯერმა კი, რომელიც პასუხისმგებელია პროექტის შედეგებზე, ამ პერიოდში შესაძლებელია მიიღოს სხვა უფრო რაციონალური გადაწყვეტილება. ამიტომ, განსაკუთრებული ყურადღება უნდა დაეთმოს მენეჯერის საქმიანობის შეფასების სისტემას, რომელიც უზრუნველყოფს მის ისეთ ქმედებებს, რომელიც ემსახურება ორგანიზაციის ეკონომიკური მიზნების განხორციელებას. ძალიან რთულია პრაქტიკაში იმის გარანტირება, რომ მენეჯერი მიიღებს ორგანიზაციისათვის ოპტიმალურ გადაწყვეტილებას, თუ მას არ ექნება ამისათვის სათანადო მოტივები. ეს მოტივები კი შეიძლება წარმოიშვას ანაზღაურების სისტემის ეფექტიანად გამოყენების შედეგად. მენეჯერი მაქსიმალურად უნდა იქნეს დაინტერესებული იმაში, რომ იმოქმედოს ორგანიზაციის ინტერესებიდან გამომდინარე. ამგვარი სირთულეების თავიდან აცილების მიზნით ორგანიზაციები მიმართავენ კაპიტალდაბანდებების შეფასების მოკლევადიან ინდიკატორებსაც. მენეჯერთა საქმიანობისა და ინვესტიციურ გადაწყვეტილებათა შეფასებებს შორის კავშირის გაუმჯობესება ხელს შეუწყობს ამ უკანასკნელის ეფექტიან ამაღლებას. მენეჯერთა საქმიანობა შეიძლება შეფასდეს ბუღალტრული აღრიცხვის შედეგების საფუძველზე. ამ მიზნით გამოიყენება მაჩვენებლები: მოგების ნაზარდი ან მოგება კაპიტალზე. მთავარი პრობლემა ისაა, რომ ადამიანმა, რომელიც იღებს გადაწყვეტილებას, აუცილებელია გადალახოს წინააღმდეგობა პირად ინტერესებსა და ორგანიზაციის ინტერესებს შორის. ამის მიღწევა კი შესაძლებელია ურთიერთკავშირის დამყარებით გადაწყვეტილების მიღებას, მოტივაციასა და მენეჯერის საქმიანობის შეფასებას შორის. ამგვარად, ორგანიზაციაში ინვესტიციური საქმიანობა მით უფრო შედეგიანი და ეფექტიანია, რაც უფრო მაღალია მოცემული პროექტის ორგანიზაციის შიგა გარემოსთან შეთანხმებისა და შეთანაწყობის დონე. როგორც ზემოთ უკვე აღვნიშნეთ, მნიშვნელოვანია კავშირი ინვესტიციურ გადაწყვეტილებებსა და სტრატეგიულ დაგეგმვას შორისაც. ეს ურთიერთკავშირი გააანალიზა თავის შრომებში რ. ბიუერმა.[1] ამ კავშირის აუცილებლობის, გასაგებად უნდა განვსაზღვროთ “სტრატეგიული გადაწყვეტილების” ხასიათი. იკვლევდა რა ინვესტიციურ პრაქტიკას, ერთ-ერთ ფირმაში ერხარდი აღნიშნავდა სტრატეგიულ დაგეგმვასა და ინვესტიციურ გადაწყვეტილებას შორის ურთიერთკავშირზე: “მიუხედავად იმისა, რომ ყველა პროექტი, რომელიც ჩვენ განვიხილეთ, მთლიანად იყო შეთანხმებული ფირმის სტრატეგიულ გეგმასთან და უდავოა გამომდინარეობდა მისგან, სრული დაბეჯითებით შეიძლება ითქვას, თვით სტრატეგიული გეგმაც ფორმირებული იყო იმ პროექტების გათვალისწინებით, რომლებიც შეიძლება გვეწინასწარმეტყველა სტრატეგიული გეგმის შედგენისას” [Эрхард Л., 1991:37]. ყოველივე ეს მეტყველებს იმაზე, რომ შეცდომა იქნებოდა ინვესტიციური გადაწყვეტილების მიღებისას მთელი ყურადღება გაგვემახვილებინა ფინანსური ანალიზის რაოდენობრივ ინსტრუმენტებზე. კაპიტალდაბანდებების სტრატეგიული წარმატების მისაღწევად საჭიროა გაცილებით უფრო მეტი. აქ გათვალისწინებული უნდა იქნეს სოციალური ფაქტორები და პოლიტიკური თამაშები, რომლებიც უკავშირდება ადამიანთა მისწრაფებას, მიაღწიონ პირად მიზანს, ძალაუფლებას და გვალენას. თუ დავუბრუნდებით ინვესტიციური პროცესების მოდელის განხილვას, ცხადი გახდება, რომ იგი ძალიან გამარტივებულია და წარმოადგენს თანმიმდევრულ, მექანიკურ ინვესტიციურ პროცესს, იდეის წარმოქმნიდან მისი რეალიზაციის კონტროლამდე. ეს არის ეკონომიკური მიზანშეწონილობის კონცეფცია, რომელშიც სტრატეგიული დაგეგმვა და ადამიანური ფაქტორი ფიგურირებს, მაგრამ ისინი ძირითადი ინვესტიციური პროცესისაგან განცალკევებულად განიხილება. ამიტომ ინვესტიციური გადაწყვეტილებების მიღებისას მაქსიმალური ეფექტიანობის მიღების მიზნით მეტად მნიშვნელოვანია სოციალური მოვლენების გათვალისწინება. ეს კი, თავის მხრივ, საშუალებას მოგვცემს, გადავლახოთ ის ძირითადი პრობლემა, რომელიც მდგომარეობს ინვესტიციური აქტივობის პროცესში თეორიისა და პრაქტიკის უნივერსალური მოდელის გამოყენებით, რომლის სქემაც მოყვანილია ქვემოთ [გელაშვილი მ. 2012: 231]. სქემა
ინევსტიციური პროცესის მოდელი დასკვნა ინვესტიციების ეფექტიანობის შეფასების თეორიისა და პრაქტიკის შემდგომი განვითარების უზრუნველსაყოფად აუცილებელია ინვესტიციათა ეფექტიანობის მაჩვენებლებისა და კრიტერიუმების უფრო საფუძვლიანი ანალიზი და კვლევა, რომელიც ძირითადად დაფუძნებულია საერთაშორისო სტანდარტებზე და სრულად პასუხობს საბაზრო ეკონომიკის მოთხოვნებს. ამავე დროს, მნიშვნელოვანია არ დაგვავიწყდეს ეროვნული ეკონომიკის თავისებურებები, რაც უნდა გამოიხატოს ეროვნული მეთოდიკების შემუშავებაში დღევანდელი რეალობის გათვალისწინებით. საქართველოში რადიკალური ეკონომიკური რეფორმის ერთ-ერთ ცენტრალურ პრობლემას წარმოადგენს ინვესტიციების სოციალურ-ეკონომიკური ეფექტიანობის ამაღლება. ინვესტიციების დასაბუთებულობის დონეზეა დამოკიდებული მთელი რიგი მნიშვნელოვანი პრობლემის გადაწყვეტა. მოცემული პრობლემისადმი დასაბუთებული და ერთგვაროვანი მიდგომა განსაკუთრებით მნიშვნელოვანია დღეს, როდესაც ჯერ ერთი, ეკონომიკაში მიმდინარეობს ევოლუციური გარდაქმნები, მეორე, როდესაც ეს გარდაქმნები ხორციელდება ყველა სახეობის რესურსზე უმკაცრესი დეფიციტის პირობებში. ამიტომაც არის, რომ საბაზრო ეკონომიკაზე გადასვლის პროცესში ინვესტიციურ გადაწყვეტილებათა შერჩევის აქტუალობა ეკონომიკური ეფექტიანობის კრიტერიუმების მიხედვით არათუ მცირდება, არამედ, პირიქით, იზრდება. გამოყენებული ლიტერატურა
|